The Virtual Republic of Egypt.....جمهورية مصر الافتراضية
بعيدا عن الاستخدمات التافهة للانترنت زي ان الواحد مثلا كان يدخل على المسنجر و يبقى يحلم ان البنت بتاعة مدينة نصر اللي ضبطها تكون مزة (دا لو طلعت بنت أصلا) أو انه على الفيسبوك مثلا يعمل اد لواحدا اسمها توتو الأمورة، أو مدام سناء على حسب الفئة العمرية اللي انت فيها أو لو كنت برئ شوية تنزل أفلام و جيمز طول النهار والليل وتتفرج على كليبات كوميدية على اليوتيوب لغاية مايجيلك مرض التوحد، أو انك تعمل فولو لواحد كوميدي على تويتر و تعمل كوبي لتويتا مضحكة من تويتاتو عندك على ستاتوس الفيسبوك..... كان العالم الافتراضي بالنسبالي زي اليتوبيا كده .. تدوينات، ناس فاهمة، اراء منطقية، أشخاص عايزين البلد متحضرة، غضب من الواقع، متابعة للأخبار ، حركات ضغط سياسي، احتجاج على الفساد ، وفجأة ايفنت للثورة
و حصل اللي حصل وكان الانترنت محفز رئيسي، والناس كلها نزلت الشارع عشان الهدف كان واحد .. اسقاط النظام .. الفكرة بقى ان مش كل دول عندهم الانترنت. علي رأي الرئيس السابق الأغلبية الكاسحة من الشعب ماتعرفش ايه النت ده بس تحمسوا و واجهوا الخوف و ده اللي نجح الموضوع
و بسبب نجاح الموضوع كل الناس بقيت تستخدم النت على أي حاجة، حتى المجلس الأعلى لقوات المسلحة بقى ليه صفحة رسمية على الفيسبوك و الحكومة برضو ليها صفحة على الفيسبوك والتويتر الناس بقى تقعد تعمل كومنتس على الرسائل بتاعة الجيش. أو المثقفين اللي على تويتر بيشتموا في صفحات الحكومة والجيش اللي على الفيسبوك
بقيت أحس ان الفيسبوك ده في وادي و التويتر دا في وادي تاني خالص المجلس العسكري عمال يبعتلنا على الفيسبوك رسائل حنونة جدا ناقص يبوسنا واحد واحد و في التويتر البلوجرز بيفكروني بتلات حاجات 1-طول اللسان و الشتيمة 2-الأخبار السيئه 3-الشتيمة في الجيش...هو مافيش بلوجر بيجيب أخبار كويسه يا جدعان؟؟
تيجي تتناقش مع حد معاهم تلقايهم عندهم هيسيتريا و بيردوا ردود مش طبيعية:
- الي هايعرضني في الراي يبقي غبي و هاعمله بلوك
اللي بيقول كلام غير اللي أنا بقولوا يبقى جاهل ومش فاهم حاجة
محدش يقوللي انزل الشارع يا ظريف منك له اكتب اسمي في جوجل و شوف انا عملت ايه قبل كدة
اللي مش مصدقني ان في ضرب نار هناك مايتكلمش معايا كتير يا ريت ينزل هناك و ياخدلوا طلقة كنوع من التجربة العملية و يبقى ارتحنا منه
بالذمة دا كلام!! دي طريقة ناس مثقفة في النقاش ؟!.. طبعا مش كلو كده يس غالبية الناس دي بتهاجم و بس و مابشفش حد فيهم بيقول كلمة حلوة في حق حد أصلا.
طيب دلوقتي كل واحد من "اليوزرز" دول بقى منفصل عن الواقع و عمال بيقاوح فى الواقع الافتراضي دا من غير ما يبقى عارف اهمية النزول للشارع... طيب يعني ايه جمهورية افتراضية وماتقوليش افتراضية دي تبقى أمك
يعني هيبقى في الصفحة المصرية لجمهورية مصر العربية
سنقوم بانتخاب (أدمن) للصفحة بدلا عن انتخاب الرئيس
سيتم اعلان الاحزاب عن طريق كتابة للخبر علي وال الصفحة
هنبلغ عن البطجية و نعملهم "ريبورت" عشان يتقبض عليهم
الجيش فعلا بدء يحارب قوى الشر و الظلام و هيحارب وحوش ستار وورز ووحوش ابو الغضب بتاع مزنجر.. الخ
ستظهر كم مش طبيعي من الحملات القومية:-
الحملة القومية لإقالة الرجل اللي بيصور صور البطاقة
الحملة القومية لجعل كرسى الرئاسة تـيـــفـال ......عشان مايلزقـش
الحملة القومية ضد السرسجية * *القبضة الدامية
الحملة القومية لرجوع الربع جنيه المخروم
الحملة الرسمية لمنع الأمهات من فتح حنفية المطبخ واحنا بنستحمى
الحملة العربية لمقاطعة قناة العربية
حملة توسيع علبة راني عشان الفاكهة مابتنزلش
الحملة القومية لطرد مصيلحي
الحملة الوطنيه لمقاومة البراشوط البرادعى
الحملة القومية لتجميع صور المزز الثورية
الحملة التثقيفية الاكترونية الأولى - دورات احتراف الفيسبوك
و مع هذا النشاط الغير مسبوق ظهر الصفحة الرسمية للبطلجية و كانت اخر عملية هي: رصد : بلطجة / انقلاب عربية تفاح امريكاني علي طريق مصر اسكندرية الصحراوي والاهالي يفدون التفاح بارواحهم لانقاذه من الطريق وانتظروا عملية جديدة في عربية القلقاس الي بعديه
بس الشهادة لله البلطجية هم الناس الوحيدين فعلا اللي شايفين شغلهم على الفيسبوك و على الحقيقة و دايما بسأل نفسي ليه البلطجيه لسه بيؤدوا عملهم بإخلاص مع إن الشعب بيعاملهم معامله سيئه واللجان الشعبيه أذت مشاعرهم..هم أجدع من الشرطه يعني؟
اه هم اجدع من الشرطة عشان الشرطة ممكن بكل سهولة تسد العجز اللي عندها بأنها تدرب خريجي حقوق و تضرب كذة عصفور بحجر بس مش راضيين و لكن أنا حاسس ان في مجلس أعلى للبطلجية بيعمل ريكروتمنت من الأغلبية الصامتة اللي عايشة اليوم بيومها
الأغلبية الصامتة الغلابة اللي يهمهم العيش و الغاز و السولار انه يبقى موجود، األغلبية الصامتة اللي الثورة دي قامت عشانهم ، الغلبية الصامتة اللسي نفسها تبطل تقرا في الجرانين عن أحداث الفتنة و البلطجة والنهب .. الخ و ترجع تاني تقرا تقرا في صفحة الحوادث أخ قتل أخوه وأم خنقت إبنها عشان كان بيعيط، ومكوجي ساعد عشيقته في قتل زوجها حتى يخلو لهم الجو....كانت أحلى أيام
أنا بكتب مش عشان اتريق على الانترنت ولا على كل واحد بيقول رايه عبيه .. بس بجد مش عايزين نفقد اداة مهمة في ادينا باختلاف اراءتا و نخلي جمهورية مصر الافتراضية هيا كمان عشوائية مش عاييزين نتحول من ناس بدأت حلم جميل لمسوخ بتنتقد أي حاجة لدرجة ان احنا بقينا ننتقد بعض و سايبين الناس بتوع الشارع تعيش اليوم بيومها و هما لسة مش فاهمين حاجة
في ناس كتير أوي عايزة تعيشها مستورة وبس وغلط ان احنا نعيش في يوتوبيا افكارنا منعزلين عن الناس دي
انتهى
ليست هناك تعليقات:
إرسال تعليق