السبت، 22 أكتوبر 2011
The Virtual Republic of Egypt.....جمهورية مصر الافتراضية
تيجي تتناقش مع حد معاهم تلقايهم عندهم هيسيتريا و بيردوا ردود مش طبيعية:
بالذمة دا كلام!! دي طريقة ناس مثقفة في النقاش ؟!.. طبعا مش كلو كده يس غالبية الناس دي بتهاجم و بس و مابشفش حد فيهم بيقول كلمة حلوة في حق حد أصلا.
سر الشاورمة الهولندية
وأخيرا سافرت أوروبا…وبعد 3 سنين عجاف من التحويش و الادخار و التقشف تمكنت من اني أشطب على أمنية من قائمة الامنيات اللي كاتبها في الورقة المكرمشة التي لا تفارق محفظتي.. و كانت وجهتي الاولى الى امستردام. هو مكنش قراري الصراحة دا كان قرار مجموعة الاصدقاء اللي اتفقت اني اسافر معاهم.. و على عكس مانتو فاكرين قرارهم مكنش مرتبط بقانونية ممارسة الدعارة هناك أو تدخين الحشيش .بالعكس “ابسولوتلي نوت” كا في مهرجان هناك اشبه بالمولد كدة وهذا المهرجان يحتفي - حلوة يحتفي دي- سنويا بنوع من الموسيقى جذورها افريقية اسمها موسيقى الهيب هوب
وذهبت الى امستردام و كنت مقضيها تمشية بالساعات وأنا ناسي نفسي من حلاوة المعمار هناك و نظافة الشوارع و حسن تخطيط الطرق التي تحدد مسارات للمشاة و الاتوبيسات و للعجل ..كلُ في مساره في منتهى النظام. و مع أول يوم تمشية حسيت بالجوع بعد 4 ساعات من المشي و كان من حظي ساعتها انه كان جنبى أحد محلات الشاورمة و مكتوب على المحل “حلال” فدخلت المحل وعرفت أن طقم العمل جوة كلهم مصريين.. و الصراحة كان الساندويتش من ألذ ساندويتشات الشاورمة اللي كلتها.. هو كان لذيذ لدرجة اني نسيت ساعتها اني دافع فيه 5 يورو أو ما يعادل حوالي 50 جنيه!!
بعد ماخلصت الوجبة اللذيذة شكرت الراجل صاحب المحل و دفعتله الفلوس و وقفت قدام المحل لمدة دقيقة عشان أفتكر الاتجاهات لو حبيت أجي في نفس المحل تاني و كملت تمشية تاني و جعت بعديها ب 3 ساعات و لقيت محل شاورمة تاني!!.. أدخل الاقي صاحب المحل مصري و الشاورمة في منتهى اللذة.. و اتكرر الموضوع دا معايا في كل المرات اللي أقرر اروح أكل فيها في محلات الشاورمة اللي هناك.. مصريين و بيعملو شاورمة حلوة
في أخر يوم ليا قررت أذهب للمطعم الي أكلت فيه في أول يوم و المطعم دا فيه قاعدة خارجية كدة و كان في جانبي شلة شباب ودودين من امريكا و جمايكا كان باين عليهم لسة ضاربين سجارة بني قاعدين جنبنا و لما عرفو اني مصر ماتكلموش معايا على الثورة و لا الكلام دا خالص.. اتكلموا معايا عن زيارتهم لمصر و أن احد المصررين الي اتعرفو! عليه هناك باعلهم أسوأ انواع الحشيش اللي شربوه في حياتهم !!(حتى في المخدرات مفضوحين) وكان من الحجات اللي قالوها ان الشاورمة هي أطعم حاجة ممكن تتاكل بعد الحشيش ..
و بعد مالاحظت موضوع ارتباط صتاعة الشاورمة في هولندا بالمصريين سألت نفسي شوية أسئلة: ليه المصررين تقريبا محتكرين صناعة الشاورمة في هولندا؟و أشمعنى الشاورمة بالذات؟ ليه لو انت عندك بيزنس بسيط في دولة في أوروبا ماتنقلش البيزنس دا لبلدك خصوصا لو انت متقن فيه و بتعملوا كويس؟ و خصوصا كمان لو البيزنس دا مطعم و احنا في بلدنا اكثر مشروعين يكسبوا مشروع المطعم و القهوة؟ ليه مافيش حد في مصر بيعمل شاورمة حلوة و لذيذة زي المصررين اللي عندهم محلات شاورمة في هولندا!!!؟ اعزائي المصريين اللي في هولندا و عندكوا محلات شاورمة.. ما هو سر الشاورمة
الهولندية!!!؟
انتهى
سيجارة في حب مصر
- لوجو حركة سيجارة في حب مصر
أعصابي باظت، كل يوم حرقة أعصاب على أخبار تقصر العمر
ملحوظة: لو انت مدخن مافيش مانع انك تولع سيجارة وانت بتقرا المقال دي لو الظروف بتسمح بكدة.. لو انت مش مدخن ماتكلمنيش انه حاجة مضرة بالصحة.. حتى اللانشون بقى مضر بالصحة يا عم
في خضم هذه الاحدث قررت أطلع في البلكونة وأولع سيجارة وأفكر بعمق و تركيز(ايوة السيجارة بتخليني أفكر بعمق واسأل أي حد بيدخن) و قعدت أفكر في ما يحدث الان و هكلمكوا بكل صراحة انا طلعتلي فكرة مجنونة اني أعمل انا كمان حركة أو حزب أو حتى جماعة .. مش مهم المصطلح .. هقوللكم اسمها ايه بس اعرفوا الاول ايه اسبابي
نظرا للدعوات المتتالية للإعتصام والتظاهر و الإضراب و المسيرات من قبل نساء وسلفيين ومسيحيين و كثرة المطالب فئوية ونظرا الي الاحداث المتتالية و المتلاحقة المتعلقة بالمحاكمات و الانشغال بالانتخبات و قوانينها. وماحدث من اشتباكات مع أهالي الشهداء من قبل و تحرييض المواطنين "الشرفاء" ضد بعضهم في ماسبيرو.
و نظرا لكثرة الغزوات و المواقع فكانت هناك موقعة الجمل وغزوة الصناديق (ياريت متحصلش تاني في انتخبات مجلس الشعب الجاية) و غزوة الجلابية وغزوة المعسل (الهجوم على قهوة البورصة ودة هيقى ليا رد عليه بعدين)
وفي وسط هذا التفكير العميق سألت نفسي.... يا ترى الأغلبية الصامتة وهم يشاهدون التلفزيونات وأخبار الإعتصامات والتظاهرات .. يا ترى بيعملوا إيه ؟؟؟؟ .. اكيد بيدخنوا .. جزء كبير منهم بيدخن ... ..طب بالنسبة للناس اللي بتنزل تتظاهر دي و بتقتحم السفارات و الكلام دة .. أكيد في منهم كتير بيدخن... المدخنين في مصر لهم صفات مشتركة كتير اللي نقدر على أساسه نصفهم على انهم فئة أو مجموعة
الفئات كتيرة والإنتماءات اكتر وكل فئة في داخلها مليون وألف احتمال .. وكل يوم تلاقي أكثر من دعوة للتظاهر والإعتصام والحاجتين المشتركتين في كل هذه الدعوات هو قائمة المطالب والرغبة في وضع نفسهم على خريطة القوى في مصر الحرة ... حقهم مليون المية وربنا معاهم جميعا وكل واحد حقه يرجع له اليوم قبل غدا بإذن الله
لهذا قررت أنا و مجموعة من الزملاء "الاتراس المدخنين" بانشاء حركة "سيجارة في حب مصر".. الحركة دي تهدف الى التقارب بين المواطنين ... ادعو جميع المدخنين الشرفاء اللي زيي الذين يبحثون عن انتماء سياسي ايدلوجي فكري جبار أن ينضمو لهذه الحركة
خصوصا ان المدخنين في مصر بالذات ليهم "بروتوكول" مع بعض و هو أسلوب تعامل بين المدخنين و بعضيهم.. تم اكتسابه ووضعه بطريقة توافقية في قمة الديمقراطية... زائد ان عندهم خلفيات و انطباعات مشتركة عن أول سيجارة وسيجارة الصبحية والسيجارة اللي بتحبس بيها بعد الأكل... وسيجارة الزهق وسيجارة الروقان (في البلكونة مع كوباية شاي، في ناس بتفضلها وهما لابسين فنلة داخلية) .. وبتاعة قبل النوم وبتاعة قعدة الشباب و الضحكة الحلوة... احنا حتى ممكن نستقطب المدخنين من التيارات والأيدلوجيات المختلفة لأني واثق ان في كتير حبهم للسيجارة ممكن يغلب على إنتماءهم الحزبي او الفكري
طب هتسألوني ايه يا عم الكلام اللي انت بتقوله دة؟ .. او ليه المدخنين وازاي ممكن يكون ليهم دور مهم أوي في الحياة السياسية في مصر... أنا شايف ان احنا محتاجين فلسفة التدخين في حجات كتير و ممكن أعمل تلخيص للنقاط دي في جزئين .. جزء بيتكلم عن الحياة بصفة عامة و جزء بيتكلم عن الحياة السياسية:
أولا الاهداف العامة:
السيجارة .. راحة واسترخاء وفرفشة .. المدخنين بطبعهم أكثر ميلا من غيرهم للإنجاز وعدم التدقيق في التفاصيل الفارغة وعدم التسرع والشعور بالحميمية مع اماكن الفرفشة والهزار والاصحاب والضحك والخروج ومصر عايزة جرعة فرفشة وراحة بدل تناحة المنظرين وتقعر الإعلاميين
السيجارة .. هدوؤ وروقان .. بعد ما تتعصب جامد أو في اوقات النرفزة الشديدة السيجارة ليها مفعول السحر في انك تهدى وتروق دمك وما تتنرفزش ... مصر اتنرفزت جامد اوي أيام الثورة ولسه بتتنرفز اكتر بس نرفزة فئوية ومحتاجة تهدى شوية ونقول للمتظاهرين بلاش نرفزة يا اخوانا
السيجارة .. حب من غير أمل ... لأنها هي الشىء الوحيد اللي بتعمله بدون اي أسباب وزي ما بيقولوا اسمى معاني الغرام الحب اللي من غير امل .. ده حتى روميو كان عايز يتجوز جوليت .. احنا مالناش أي اغراض في السيجارة حب وبس .. حب نقي وطاهر وعفيف عايزين نحب مصر بالطريقة دي
السيجارة .. انتظار لطيف .. لأنها قتل لأوقات الإنتظار يعني نشرب سيجارة ونستنى شوية على مصر مش لازم نطلب دلوقتي
السيجارة .. لحظة تأمل ... ناس كتيرة في حاجة للحظة دي .. مصر نفسها محتاجة اللحظة ديالسيجارة .. فاصل .. بتكون في كتير من الاوقات فاصل بين اوقات الحياة الصعبة يعني تشرب سيجارة وتفكر في الخطوة التاليةالسيجارة .. نفس الحرية .. الخروج من اي مكان مغلق زي اجتماع او ندوة او محاضرة هو في حد ذاته له فرحة مضاعفة للمدخن ما بالك ومصر كلها خارجة من اصعب مراحل حياتها ... السيجارة دي هتبقى تاريخية على فكرةالسيجارة .. راحة واسترخاء وحب من غير امل وانتظار لطيف ولحظة تأمل وفاصل لإلتقاط الانفاس .. أنفاس الحرية
ثانيا الاهداف السياسية:
فاكرين "بروتوكول المدخنين" اللي قلتلكم عليه؟ فيه حجات كتير جدا ممكن تفيدنا
الاحساس بالشراكة و تنمية روح التكافل: من الصعب جدا ان تجد اخاك المدخن في حالة يرثى لها بدون سجائر..فعلى أقل تقدير بتعزم عليه بسجارتين أو تقول "علبتي تحت أمرك خد براحتك يا معلم".. في ناس هتقول إن دي سذاجة و طيبة زيادة عن اللزوم... أحب قول لهم لأ.. مع كل هذا الود بين الاخوة المدخنين فهناك خطوط حمراء لا يجب تجاوزها.. الولاعة.. ماينفعش تاخد ولاعتي وتضرب عليها عشان أنا كويس معاك..الولاعة خط أحمر.. دة إثبات انه لا يوجد إغفال للمصلحة الشخصية
دفع عجلة التنمية: السجاير هي من أكثر السلع اللي عليها ضرايب ..إنك تشتري سجارة فيه مساهمة صادقة من المدخنين لملئ خزنة الدولة بالاموال... في ناس هتقول و الفلوس اللي بنخسرها على الصحة؟ الكلام دة لو كانت الدولة بتعمل مستشفيات... دلوقتي كل المستشفيات بقت زي مستشفي سرطان الاطفال بينزلوا اعلانات يلموا فلوس من الناس (و دي مصيبة لوحدها) !! اعتبر انك بتزكي عن صحتك يا أخي
نشر ثقافة احترام الاقليات: يتعرض المدخنين بصفة عامة لاضطهاد.. مهما كان الاضطهاد دا قانوني و مبرر عشان أحافظ على صحة الناس التانيين.. دة مش معناه ابدا انك مثلا تحطلي أوضة ازاز صغيرة زي قفص الشمبنزي في مطار طويل عريض و نتكوم فيه انا و الاخوة المدخنين بأسلوب غير أدمي و الناس بتتفرج علينا كمان...إحنا اصلا مش أقلية و بنتعامل كدة بس أكيد إحنا مش هنعامل الاقليات زي مالناس بتعاملنا
ممارسة الديمقراطية: لما واحد من الركاب بيدخن في الميكروباص و الناس تعترض على التصرف دة بيضطر يسمع كلمهم لو هما أغلبية.... انا بعيني شفت الموقف دة.. لأ و بعديها سواق الميكروباص ولع سيجارة .. جه الراكب المدخن دة احتج و طلب بالمساواة في المعاملة بينه و بين السواق مع ان السواق هنا هو بمثابة "القائد" و الراكب دة مواطن عادي ... و فعلا السواق طفى السجارة والقاعدة مشيت على الكل .. شايفين الديمقراطية؟
بالنسبة لمقر الحركة انا فكرت الاول في مصنع السجاير الكيلوباترا بس مش عايز الناس تفتكر انها حركة فئوية فقررت إن مقر الحركة يكون في قهوة البورصة.. أهو مكان شعبي و نتضامن معاهم عشان اللي حصلهم.. و في نفس الوقت هنستفيد بالشهرة الاعلامية اللي عند القهوة دي
وفي النهاية .. التدخين ضار جدا بالصحة ولا يسبب الوفاة فالأعمار بيد الله وكما قال الشاعر :
... وكم من صحيح مات فجأة .. و كم من مدخنا عاش حينا من الدهر
التدخين ليس شرور إحنا بنشوفه في السينما دايما كتير و بنربطه بالاستاذ غسان مطر لكن ممكن يكون في ناس طيبة مدخنة زي محمود الجندي و كمال أبو رية
نقبل عضوية غير المدخنين ويراعى اداب التدخين في وجودهم
سيجارة في حب مصر، شعارنا: اشرب نفس الحرية واستنى على مصر شوية
انتهى
رامي القاضي
اكتوبر 2011
ارجو منكم الضغط على الرابط بالاسفل و قوموا بضغط زر "لابك" أو "اعجبني" لتساعدوني في نشر هذه المقالة
If you like this post please re-blog it and press the facebook like button on the following link to be posted on one of the leading Egyptian magazines:
الاشتراك في:
الرسائل (Atom)